احنا ليه كلنا بعااااد عن بعض جوة البيت؟؟

صح كلام سليم

في كتير ناس بتعاني من هالمشكلة

واكيد اللوم بيرتمي على الاهل ممثلة بالام والاب

لانو هما لو انصلح حالهم البيت كو بينصلح

تحياتي

بصراحه دى من الحجات الى الواحد لما بيكبر بيندم انه ما قضهاش لانها بتبقى من اجمل الذكريات
وبتكون اجمل واجمل لما بتكون مع اهلك الى بيحبوك بجد
وبجد ياريت الواحد يفكر بسرعه قبل ما اللحظات دى تضيع منه ويندم لما يكبر زى ناس كتير ندمت على كده




اخوكم احمد

عندما لا يوجد حب ف المنزل..فأين يكون !!!
هنلاقيه فين ؟ هه؟
لو ملاقناش حب وألفة واهتمام ورعاية وحنين وشوق جوة البيت
تقدروا تقولولي هنلاقيه فين؟
انا مش بسأل انا بس مستغرب
مستغرب أوي
هندور عليه فين تاني مدام مش موجود بين ناس
المفروض انهم دمنا ولحمنا
وحنا دمهم ولحمهم
أنا ممكن مستغربش من صاحب مبيحبش صحبه
او زميلة مبتحبش زميلتها
بكرهه لله ف الله ..
واحد مش بطيقه ولا بحبه
ولا يفرق معايا حبه
لكن استغرب أوي لما تيجي الشكوي دي من أخويا أو اختي
استغرب اكتر لما الاقي كلام دة جاي من بنت لأمها
ومن أب لأبنه
ولما الاقي بنت بتقولي ماما مش بتحبني
مفيش مابيني وبين أبويا أي كلام
كله شخط ونطر منه وعمره مافكر يسمعني
انا عمري ماقعدت وتكلمت مع أبويا لأنه بيزعق طول الوقت
وبيتخانق مع ماما طول الوقت
وبيضرب أخويا طول الوقت
بابا ف حاله وملوش دعوة بحد
وماما طول اليوم مشغولا
أنا حاسة اني ف بيت اني غريبة فيه
قصص وحكايات
ايه اللي حصل للحب اللي جوة البيت ؟
ليه بقا كل واحد لوحده؟
ليه بقا كل حد ف حاله حتي جوة البيت ؟
كل اللي يهمنا الأكل والشرب والمصروف وبس
كل اللي يشغل بالنا ..حياتنا الشخصية وبس؟
انا مش بتهم الأب ولا الأم لوحدهم ..فيه كمان ولاد وبنات بعااااااد جدا عن أهاليهم معرفش ليه ؟
ايه السبب وايه اللي حاصل وحاصل ليه ؟
طب وقت الدراسة وقولت ماشي ممكن تكون مشغول او مش فاضية كلية كل يوم ومحاضرات طول اليوم ويدوبك بترجعي تاكلي وتنامي أو تخشي تذاكري , طب دلوقتي أحنا اهو بقينا ف اجازة , ومفيش حاجة شغلاك , ليه بقا انت بعيد عن أهلك واهلك بعاد عنك , ليه قافل علي نفسك وعلي اسرارك محدش يعرف انت بتحب مين ولا مامتك عارفه انتي بتكلمي مين من وراها ...انا نفسي بس قبل مانقعد ونسمع بعض ونكلم ..كل واحد ينادي علي اخوه أو اخته ..ينده علي باباه أو أمه أو الأتنين مع بعض عشان يجاوبوا معانا ع السؤال دة؟
عاوزين بجد نعرف المشكله فيه ومين السبب ؟ مهو لازم نحل الموضوع دة ..لأني انا مش ببص للنهاردة أنا ببص لبكرة واجيال بكرة ..مدمنا احنا كدة دلوقتي بكرة هيكون شكلنا ايه ؟
حد فكر ..هو هيكون شكله عامل ايه لو فضل كدة بعد عن اهله واهله فضلوا بعاد عنه ؟؟ هيبقا حاله ازاي بكرة ؟
المصيبة مش ف بس ان بقت فيه غربة جوة البيت وبين الناس وبعضها
المصيبة الاكبر انك لما تحاول تعوض الحب دة بحب تاني
تدور عليه ف مكان تاني
ممكن توقعك ف صاحب يوديك ف سكة ملهاش رجوع أو ف واحدة تاكل بعقلك حلاوة وتبعدك مش بس عن اهلك
لأ تبعدك عن أهلك واصحابك ودينك وربك إن لزم الأمر
او تعرفي ولد يضحك علي عقلك ويشقلب كيانك وبالتالي انتي ترمي حملك كله عليه
واسرارك كله عنده ,تترمي ف حضنه أملا منك أنو يعوضك عن حب انتي محتاجاة
وحنين انتي مفتقداه
لكن للأسف المصيبة بتكون اكتر
والكارثة بتكون أكبر
وبدل ماتهربي من مشكلة تروحي لمشكلة أكبر ..
انا ليه بقول الكلام دة ..لأننا مهما حاولنا مش هنقدر نعوض حب أهلنا لينا وحبنا لأهلنا بأي حب تاني دي حاجة ,وحاجة تانية أني شوفت أن اكتر المصايب اللي بتحصل بأسم الحب بتيجي بسبب ان الولد او البنت مفيش حد قريب منهم من أهلهم وبفتقدوا الحب دة جوة البيت ف بيدوروا عليه بره لكن مش بيلاقوا حاجة ...
نادر أوي لما نلاقي يقف جنبنا ويساعدنا ويتغلب معانا علي مشاكلنا مع بابا وماما ..ويعوضنا عن الحب دة ..دة نلاقيه فين ف زمن الكل فيه بيحاول يخطف علي قد مايقدر اللي يقدر عليه ..ف مبالك بقا لما تكون لوحدك محدش جنبك ,فمبالك بقا لما تكوني لوحدك لا حول لك ولا قوة ..بنت ملهاش أي خبرة ف الحياة وملهاش أي تجارب .
أنا بس بحاول أفتح الباب دة معاكوا لأني عارف أن البيوت فيها كتييييييير اووي وفيه كتير اوي عاوز يتكلم ف دة ونفسه يطلع اللي جواة ويقول كلمة لباباه او لمامته او لحد من اخواته ويسألهم ...أحنا ليه كدة بقينا بعيد عن بعض رغم اننا جوة بيت بيت ,يجمعنا سقف بيت واحد وباب بيت واحد ..وكذلك لحم ودم برضو واحد !!!
سؤال ياريت حد يجاوبني عليه لأني بجد مش لاقيله اجابة
وسؤال تاني مهم أوي ..لو احنا كدة دلوقتي أمال ولادنا هيكونوا عاملين ازاي معانا ؟؟؟؟
وسؤال أهم ..هل ياتري حاولت ف فترة الاجازة دي انك تقرب من مامتك أو باباك أو اخوك وتقوله ع الحد اللي بتحبه
أو علي أي حاجة تخصك ..؟؟